काठमाडौँ । त्रिभुवन विश्वविद्यालय (त्रिवि) केन्द्रीय क्याम्पस, कीर्तिपुरको स्वतन्त्र विद्यार्थी युनियन (स्ववियु) चुनाव अनिश्चितकालका लागि स्थगित गरिएको छ।

यसअघि भोलिका लागि तय गरिएको मतदान निर्वाचन समितिले स्थगित गर्ने निर्णय गरेको छ।

केन्द्रीय क्याम्पसको स्ववियु चुनावबारे उच्च अदालत पाटनमा मुद्दा परेकाले निर्वाचन प्रक्रिया रोकिएको हो। अदालतमा आज अन्तरिम आदेश दिने वा नदिने विषयमा सुनुवाइ तोकिएको थियो। तर अन्य विपक्षी पक्षहरूको नाममा म्याद तामेल नभएकाले अन्तरिम आदेशबारे पुनः चैत १० गते सुनुवाइ हुने भएको छ।

त्रिविका ६२ आङ्गिक क्याम्पसमध्ये २१ क्याम्पसमा चुनाव स्थगित भएको छ। यद्यपि, देशभरका तीन सयभन्दा बढी आङ्गिक र सम्बन्धन प्राप्त क्याम्पसहरूमा मतदान सम्पन्न भइसकेको छ, र हाल नतिजा सार्वजनिक गर्ने प्रक्रिया जारी छ।