सुर्खेत । नेपाल पत्रकार महासंघ सुर्खेत शाखाले आफ्नो डिजिटल प्लेटफर्म www.fnjsurkhet.org सार्वजनिक गरेको छ।

आइतबार पत्रकार महासंघका केन्द्रीय अध्यक्ष निर्मला शर्माले वेबसाइटको शुभारम्भ गरेकी हुन्। उनले वेबसाइटले जवाफदेही र पारदर्शी पत्रकारिताको अभियान अघि बढाउने बताइन्। महासंघको कार्ययोजना अनुसार वेबसाइट निर्माण गर्ने पहिलो शाखा सुर्खेत भएको शर्माले उल्लेख गरिन्।

महासंघका केन्द्रीय महासचिव रामप्रसाद दाहालले वेबसाइटमार्फत पत्रकार तथा सरोकारवालालाई आवश्यक जानकारी लिन सजिलो हुने बताए।

सञ्चारमाध्यममाथि चुलिँदो दबाबबारे बोल्दै दाहालले संघीय सरकारले ल्याएको सामाजिक सञ्जाल नियमन विधेयक प्रेस स्वतन्त्रतामै आघात पुग्ने गरी आएको आरोप लगाए। उनले प्रदेश र स्थानीय तहले बनाएका कतिपय कानुन पनि प्रेसमैत्री नरहेको बताए।

पत्रकारहरुको श्रम अधिकारका विषयमा महासंघ खरो रूपमा उत्रिएको दाहालले दाबी गरेका छन्। महासंघले पत्रकारहरुलाई सामाजिक सुरक्षा कोषमा आबद्ध गराउन विशेष पहल गरिरहेको उनले जानकारी दिए।

पत्रकार महासंघ सुर्खेत शाखाका अध्यक्ष सुशीलराज शर्माले कार्ययोजनाअनुसार वेबसाइट निर्माण गरिएको बताए। उनले श्रमजीवी पत्रकारका पक्षमा वकालत गर्दै महासंघले आगामी दिनमा थप योजनाहरू अघि बढाउने उल्लेख गरे।

वेबसाइटमा ‘हाम्रो बारेमा’ भन्ने खण्डमार्फत महासंघको इतिहास, उद्देश्य र उपलब्ध उपलब्धिहरू प्रस्तुत गरिएको छ। साथै, ‘कार्यसमिति’ र ‘सदस्य सूची’ खण्डमा हालसालका सक्रिय सदस्यहरूको परिचय र सम्पर्क विवरण उल्लेख गरिएको छ जसले संगठनभित्रका कार्यशैली र पारदर्शिता झल्काउँछ।

सूचना र प्रेस विज्ञप्ति खण्डमार्फत संगठनद्वारा जारी गरिएका नवीनतम सूचनाहरू र कार्यक्रमहरूको विस्तृत विवरण उपलब्ध गराइएको छ। फोटो ग्यालरीमा विभिन्न कार्यक्रम र बैठकका तस्बिरहरूको संग्रह प्रस्तुत भएको हुँदा, पत्रकार समुदायलाई घटनाक्रमको दृश्यात्मक परिचय प्राप्त हुनेछ।

यस वेबसाइट सार्वजनिक गर्नुले डिजिटल युगमा सूचना प्रवाहलाई द्रुत, प्रभावकारी र पारदर्शी बनाउने दिशामा महत्वपूर्ण पहल भएको भन्दै संघका नेताहरूले सकारात्मक प्रतिक्रिया जनाएका छन्। यसले पत्रकारिता क्षेत्रमा नयाँ उचाइमा प्रवेश गर्ने र क्षेत्रीय समाचार सञ्जाललाई थप सशक्त बनाउने विश्वास छ।