काठमाडौं। धारा नेपालगञ्ज म्याराथनका चार सदस्यीय पदाधिकारी टोली थाइल्यान्डको बैंकक प्रस्थान गरेको छ। टोलीले शुक्रवार बैंकक नजिकैको ब्याङ्सेन सहरमा हुने ‘एसिया रोड रेस फोरम’ मा सहभागिता जनाउने छ।

टोलीमा अध्यक्ष टीएस ठकुरी, सदस्य जनक नेपाल, कपिल थापा र कुमार शमशेर थापा छन्। सुर्खेत निवासी कुमार थापा धारा नेपालगञ्ज म्याराथनको भगिनी कार्यक्रम ‘ज्ञान कर्णाली हाफ म्याराथन’ का सदस्य सचिव समेत हुन्।

धारा नेपालगञ्ज म्याराथनले एसियाली दौड सम्मेलनमा यो दोस्रो पटक सहभागिता जनाउन लागेको हो। गत वर्ष संस्थापक अध्यक्ष ठकुरीले थाइल्यान्डको हातएईमा आयोजित सम्मेलनमा भाग लिएका थिए।

थाइल्यान्ड मास स्पोर्ट्स पार्टिसिपेन्ट एसोसिएसनले पूर्वी एसियाली मुलुकहरू लक्षित गर्दै हरेक वर्ष फरक सहरमा एसिया रोड रेस फोरमको आयोजना गर्दै आएको छ। यस फोरममा विश्वभरका दौड विज्ञहरूसँग अन्तरक्रिया हुने र अनुभव आदानप्रदान गर्ने अवसर मिल्ने organizers ले जनाएका छन्।

फोरमपछि एक्स्पो भ्रमणको पनि कार्यक्रम रहेको छ, जसबाट नयाँ सीप र जानकारी हासिल गर्ने अपेक्षा गरिएको छ।

यसैबीच, रेस नेपालले आगामी जेठ २३ र २४ गते काठमाडौंमा ‘काठमाडौं २५के नेपाल हेरिटेज रन’ तथा ‘नेपाल इन्टरनेसनल रनिङ कन्फ्रेन्स’ को आयोजना गर्न लागेको छ। साथै, विश्व म्याराथन संस्था ‘एसोसिएसन अफ इन्टरनेसनल म्याराथन एण्ड डिस्टेन्स रेस’ को बोर्ड बैठकको पनि आतिथ्यता गर्ने तयारी गरिएको छ।

टोली आइतबार बिहान ब्याङ्सेन १० किमि दौड अवलोकन गरेपछि नेपाल फर्किने कार्यक्रम छ।