सुर्खेत। कर्णाली प्रदेशमा पत्रकारिता क्षेत्रलाई सुरक्षित, मर्यादित र उत्तरदायी बनाउन “फ्रि मिडिया नेटवर्क” गठन गरिएको छ।

नेपाल पत्रकार महासंघ, कर्णाली प्रदेश समितिको कार्यालयमा सम्पन्न छलफलपछि गठन गरिएको यस नेटवर्कले पत्रकारहरूमाथि हुने हिंसा तथा जोखिम न्यूनीकरण गर्दै उनीहरूको सुरक्षाका लागि विशेष पहल गर्नेछ।

महासंघका कर्णाली प्रदेश अध्यक्ष विष्णु प्रसाद शर्माको संयोजकत्वमा गठित नेटवर्कले पत्रकारहरूको भौतिक सुरक्षा, पेसागत मर्यादा र जिम्मेवारीलाई थप व्यवस्थित बनाउने लक्ष्य राखेको छ।

गठन कार्यक्रममा नेपाल पत्रकार महासंघका केन्द्रीय अध्यक्ष निर्मला शर्मा, महासचिव रामप्रसाद दाहाल, पूर्व कोषाध्यक्ष कलेन्द्र सेजुवाल, केन्द्रीय सदस्य नगेन्द्र उपाध्याय, नेपाल प्रेस युनियनका उप-महासचिव कमल पन्त, प्रदेश सरकारका प्रतिनिधिहरू, सुरक्षाकर्मी, नागरिक समाज, कानुन व्यवसायी, मानव अधिकार संस्था, नगरपालिका तथा गाउँपालिका महासंघका प्रतिनिधि तथा पत्रकारहरूको उपस्थिति रहेको थियो।

फ्रि मिडिया नेटवर्कले पत्रकारहरूका समस्या पहिचान गरी समाधानका लागि पहल गर्ने, हिंसा तथा अन्य जोखिम न्यून गर्न काम गर्ने तथा प्रेस स्वतन्त्रताको रक्षा गर्ने प्रतिबद्धता जनाएको छ। पत्रकारिता पेशालाई सुरक्षित र मर्यादित बनाउने अभियानस्वरूप यो नेटवर्क प्रभावकारी रूपमा अघि बढ्ने अपेक्षा गरिएको छ।