काठमाडौं । नेपाल प्रहरी प्रमुख वसन्तबहादुर कुँवरसहित ९ जना उच्च प्रहरी अधिकृत सोमबार अनिवार्य अवकाशमा गएका छन्। उनीहरूको अवकाशसँगै नयाँ महानिरीक्षक चयनको प्रक्रिया अघि बढ्ने भएको छ।

अवकाशमा जाने अधिकृतहरूमा प्रहरी महानिरीक्षक (आईजीपी) कुँवरसँगै अतिरिक्त महानिरीक्षक (एआईजी) टेकप्रसाद राई, कुवेर कडायत, बुद्धि गुरुङ, दुर्गा सिंह र जनक भट्टराई छन्। त्यस्तै, नायब महानिरीक्षक (डीआईजी) गणेश चन्द, भोला रावल र ध्रुवराज राउत पनि अनिवार्य अवकाशमा गएका छन्।

नयाँ प्रहरी प्रमुख नियुक्त गर्न सोमबार अपराह्न मन्त्रिपरिषद् बैठक बस्ने तयारी छ। नेपाल प्रहरीको नेतृत्वका लागि एआईजी दीपक थापा, सुदीप गिरी र टेकबहादुर तामाङ प्रतिस्पर्धामा छन्।

नियमअनुसार ज्येष्ठता, कार्यकुशलता र कार्यक्षमताका आधारमा आईजीपी नियुक्त गरिने प्रावधान छ। वरियतामा पहिलो स्थानमा रहेका एआईजी दीपक थापा प्रहरी महानिरीक्षक बन्ने बलियो सम्भावना रहेको स्रोतको दाबी छ।

सुरक्षा संगठनको नेतृत्व छिटो टुंगो नलगाउँदा प्रहरी संगठनभित्र अन्योल बढेको भन्दै सरकारको आलोचना भइरहेको छ। मन्त्रिपरिषद् बैठकपछि सरकारले निर्णय सार्वजनिक गर्ने अपेक्षा गरिएको छ।