सुर्खेत । जाजरकोटमा रुखबाट लडेर दुई महिलाको मृत्यु भएको छ।

छेडागाड नगरपालिका-६ की ४६ वर्षीया सरिता केसीको घाँस काट्ने क्रममा आइतबार मृत्यु भएको छ। उनी उलीसैन जंगलमा घाँस काट्ने क्रममा रुखबाट लडेकी थिइन्। गम्भीर घाइते भएकी केसीको घटनास्थलमै मृत्यु भएको थियो।

यस्तै, कुशे गाउँपालिका-९ की १८ वर्षीया पुष्पानाथ गिरीको पनि रुखबाट लडेर मृत्यु भएको छ। शनिबार बिहान माइती गएका बेला नलफुस्थित जंगलमा काफल खाने क्रममा रुखबाट लडेर उनी गम्भीर घाइते भएकी थिइन्। उपचारका लागि नेपालगञ्ज लैजाने क्रममा कोहलपुर अस्पतालमा आइतबार दिउँसो ३ बजे उनको मृत्यु भएको कुशे गाउँपालिका-९ का वडा अध्यक्ष शिवराज गिरीले जानकारी दिए।