सुर्खेत। माध्यमिक शिक्षा परीक्षा (एसईई) २०८१ यहि चैत ७ गतेदेखि सञ्चालन हुँदैछ। कर्णाली प्रदेशबाट यस परीक्षामा ३७ हजार ९११ परीक्षार्थी सहभागी हुने भएका छन्। परीक्षा व्यवस्थित रुपमा सञ्चालन गर्न सम्पूर्ण तयारी पूरा भइसकेको शिक्षा विकास निर्देशनालय, कर्णाली प्रदेश सुर्खेतले जनाएको छ।

कर्णालीका १० जिल्लाबाट परीक्षा दिन लागेका परीक्षार्थीमध्ये नियमिततर्फ ३४ हजार ४४४, साधारणतर्फ ३ हजार ३३८, प्राविधिकतर्फ १०६, र ग्रेड वृद्धितर्फ २२४ जना रहेका छन्।

प्रदेशका १८० परीक्षा केन्द्रमध्ये सुर्खेतमा सबैभन्दा बढी ३३ वटा परीक्षा केन्द्र छन् भने डोल्पामा सबैभन्दा कम ४ वटा मात्र छन्। परीक्षामा केन्द्राध्यक्ष १८०, सहायक केन्द्राध्यक्ष २५२, निरीक्षक १,८९५, परीक्षा सहायक ३८०, कार्यालय सहयोगी ७५८, तथा सुरक्षाकर्मी २,७०० गरी कुल ६,१६५ जना जनशक्ति परिचालन गरिनेछ।

कर्णालीका जिल्लागत परीक्षार्थी सङ्ख्या हेर्दा, सबैभन्दा बढी सुर्खेतबाट ९,५१३ विद्यार्थी परीक्षा दिनेछन् भने सबैभन्दा कम डोल्पाबाट ७७७ परीक्षार्थी सहभागी हुनेछन्। दैलेखबाट ६,१९६, जाजरकोटबाट ४,६६८, सल्यानबाट ४,२६९, कालिकोटबाट ४,०८९, रुकुम पश्चिमबाट ३,६६८, जुम्लाबाट २,६८१, हुम्लाबाट १,१०४, र मुगुबाट ९४६ परीक्षार्थी एसईईमा सहभागी हुनेछन्।

शिक्षा विकास निर्देशनालयका अनुसार परीक्षा सञ्चालनका लागि आवश्यक उत्तरपुस्तिका सबै जिल्लामा पठाइसकिएको छ। परीक्षा सहज बनाउन प्रत्येक जिल्लामा इकाई प्रमुखहरूसँग दुईदिने अभिमुखीकरण कार्यक्रम सम्पन्न भइसकेको छ।
परीक्षा व्यवस्थापन र सञ्चालनका लागि रु १ करोड ३९ लाख ३० हजार ५ सय बजेट छुट्याइएको छ । जसअनुसार परीक्षा केन्द्रका लागि रु १ करोड २४ लाख ९५ हजार ७५० र इकाईका लागि रु १४ लाख ३४ हजार ७५० विनियोजन गरिएको छ।

शिक्षा अधिकारी लोकप्रसाद पौडेलका अनुसार परीक्षा सफल र व्यवस्थित रूपमा सञ्चालन गर्नका लागि सबै तयारी पूरा गरिएको छ। परीक्षार्थीहरूको सहजता र सफलता सुनिश्चित गर्नका लागि नयां उपायहरू लागू गरिएको छ, ताकि उनीहरूले निश्चिन्त मनस्थितिमा परीक्षा दिन सकून् भन्ने रहेको बताए ।

कर्णाली प्रदेशमा परीक्षा निष्पक्ष र मर्यादित बनाउन विशेष सुरक्षा व्यवस्था मिलाइएको छ। परीक्षा अनुशासन कायम राख्न पर्याप्त सुरक्षाकर्मी परिचालन गरिनेछ। साथै, परीक्षार्थीलाई केन्द्रसम्म सहज पहुँच सुनिश्चित गर्न प्रशासनले विशेष ध्यान दिएको छ।