काठमाडौं। राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसईई) सञ्चालनमा कुनै पनि अवरोध नगर्न सबै पक्षलाई आग्रह गरेको छ।
मधेस प्रदेशका मुख्यमन्त्री सतिशकुमार सिंहले बिहीबारदेखि सुरु हुने एसईई परीक्षामा प्रदेश सरकार सहभागी नहुने घोषणा गरेपछि बोर्डले यस्तो चेतावनी दिएको हो।
बोर्डका अध्यक्ष महाश्रम शर्माले प्रदेश सरकारले गरेका निर्णयमा बोर्डले हस्तक्षेप गर्न नमिल्ने भए पनि परीक्षा सञ्चालनमा अवरोध आउन नहुने बताए। उनले परीक्षा मर्यादित बनाउन सबै पक्षको सहकार्य आवश्यक रहेको उल्लेख गर्दै, समस्या समाधानका लागि प्रदेश परीक्षा व्यवस्थापन कार्यालय र जिल्ला परीक्षा समन्वय समितिले तत्काल छलफल गर्नुपर्ने बताए।
मधेस प्रदेश सरकारले परीक्षा केन्द्रका प्रमुख (केन्द्राध्यक्ष) गोलाप्रथाबाट छनोट गर्नुपर्ने निर्णय गरेको थियो। तर, जिल्ला परीक्षा समन्वय समितिले सो निर्णय कार्यान्वयन नगरेको भन्दै मुख्यमन्त्री सिंहले प्रदेश सरकार परीक्षामा सहभागी नहुने घोषणा गरेका थिए। यद्यपि, उनले परीक्षा सञ्चालनमा अवरोध नहुने स्पष्ट पारेका छन्।
एसईई परीक्षा भोलि (बिहीबार) बिहानदेखि सुरु हुँदैछ, जसमा मधेस प्रदेशबाट ८८,८५८ विद्यार्थी सहभागी हुनेछन्।
फ्याक्ट सञ्चार । २०८१ चैत्र ५ गते बुधवार