सुर्खेत । सुर्खेत महिला जेसीज वर्ष २०२५ को आयोजनामा वीरेन्द्रनगर–३, सुर्खेतस्थित सेन्ट मेरिज स्कुलमा आत्मसुरक्षा तालिम सम्पन्न भएको छ।

विद्यालयका छात्राहरुलाई आत्मरक्षा सम्बन्धी आवश्यक सीप र ज्ञान प्रदान गर्ने उद्देश्यले यो तालिम आयोजना गरिएको सुर्खेत महिला जेसीजले जनाएको छ ।

कार्यक्रमका प्रशिक्षक एवम् सुर्खेत महिला जेसीजका कोषाध्यक्ष पशुपति बुढाले आत्मसुरक्षासम्बन्धी विभिन्न प्रविधि सिकाउँदै
आत्मरक्षाका लागि सही सीप सिक्नुपर्ने बताइन् । उनले केवल शारीरिक बल मात्रै होइन, सही रणनीति र मानसिक तयारीले पनि महिलाहरूलाई सुरक्षित राख्ने समेत बताइन् ।

यसैगरी, आत्मसुरक्षा तालिमलाई अभियानका रूपमा सुरु गरेकी सुर्खेत महिला जेसीज वर्ष २०२० की अध्यक्ष प्रमी शाक्यले भनिन्,”महिलाहरूको सुरक्षाको विषयलाई ध्यानमा राख्दै हामीले यो अभियान सुरु गरेका थियौं। आज यो निरन्तरता पाइरहेको देख्दा खुशी लागेको छ। आत्मरक्षा तालिमले महिलाहरूलाई हरेक परिस्थितिमा सक्षम र आत्मनिर्भर बनाउनेछ।”

कार्यक्रममा सेन्ट मेरिज स्कुलका संचालक नवराज गुरुङले आत्मसुरक्षाको महत्वबारे बोल्दै हालको समयमा आत्मरक्षा सबैका लागि अनिवार्य विषय रहेको जनाए । विशेषगरी महिलाहरूले आफूलाई सुरक्षित राख्न यस्ता तालिम आवश्यक रूपमा लिनुपर्ने बताउदै यस्ता कार्यक्रम निरन्तर आयोजना हुनु आवश्यक रहेको जनाए ।

कार्यक्रमका प्रमुख अतिथि एवं सुर्खेत महिला जेसीजकी संस्थापक महासचिव तथा वर्ष २०१३ की अध्यक्ष ज्योति कार्की पौडेलले आत्मनिर्भर महिलाका लागि आत्मसुरक्षा अनिवार्य रहेको बताइन्। उनले भनिन्, “महिलाहरूलाई आत्मरक्षा सिप सिकाउनु हाम्रो संस्थाको प्रमुख उद्देश्य हो। आत्मनिर्भर र सक्षम महिला समाजको मेरुदण्ड हुन्। यस्तो तालिमले उनीहरूलाई थप आत्मविश्वासी बनाउँछ।”

त्यसैगरी, कार्यक्रममा अधिवक्ता पृथ्वीनाथ राईले कानूनी पक्षबारे प्रकाश पार्दै भने महिलाहरूले आफ्नो सुरक्षाका लागि कानूनी अधिकारबारे जान्नु अत्यन्त आवश्यक रहेको बताए । हिंसा, दुर्व्यवहार वा कुनै प्रकारको अन्याय सामना गर्दा कानूनी सहायता लिनुपर्ने बताउदै आत्मरक्षा तालिमका साथै कानूनी चेतना पनि अनिवार्य रूपमा आवश्यक रहेको बताए ।

सुर्खेत महिला जेसीज वर्ष २०२५ की अध्यक्ष कमला बस्याल देवकोटाले महिलाहरूलाई आत्मसुरक्षाको आधारभूत ज्ञान प्रदान गर्न यस्तो तालिम निरन्तर आयोजना गरिरहने जनाउदै समाजलाई सुरक्षित बनाउन महिलाहरू आफैं सुरक्षित हुन आवश्यक रहेको बताईन् ।

तालिममा विभिन्न विद्यालयका छात्रा, अभिभावक तथा महिला सहभागी भएका थिए। तालिम सफलतापूर्वक सम्पन्न भएपछि सहभागीहरूले पनि सिकेका सीपहरू उपयोगी रहेको प्रतिक्रिया दिएका छन्।