काठमाडौं : प्रधानमन्त्री केपी शर्मा ओली आज थाइल्याण्डको औपचारिक भ्रमणका लागि बैंककतर्फ प्रस्थान गर्दै छन्। भ्रमणका क्रममा उनी बिमस्टेक शिखर सम्मेलनमा सहभागी हुनेछन्।

थाइल्याण्डका प्रधानमन्त्री फेथोङथान सिनावातको निमन्त्रणामा नेपालको तर्फबाट पहिलोपटक यस्तो औपचारिक भ्रमण हुन लागेको हो। प्रधानमन्त्री ओली नेतृत्वको टोली दिउँसो १ः३० बजे थाइ एयरलाइन्समार्फत बैंककतर्फ जानेछ।

भ्रमणको क्रममा ओलीले थाइल्याण्डका प्रधानमन्त्रीसँग द्विपक्षीय वार्ता गर्नेछन्। पर्यटन र संस्कृतिसम्बन्धी छ वटा समझदारीपत्रमा हस्ताक्षर हुनेछ। वार्तापछि दुवै प्रधानमन्त्रीले संयुक्त पत्रकार सम्मेलन गर्नेछन्। साथै, ओलीले थाइल्याण्डका नरेशसँग भेटवार्ता गर्ने कार्यक्रम रहेको छ।

चैत २१ गते बिहान ओलीले थाइल्याण्डका प्रतिष्ठित व्यवसायीहरूसँग छलफल गर्नेछन् भने दिउँसो एसियन इन्स्टिच्युट अफ टेक्नोलोजीको कार्यक्रममा सम्बोधन गर्नेछन्। साँझ बिमस्टेक शिखर सम्मेलनका नेताहरूलाई दिइने औपचारिक रात्रिभोजमा सहभागी हुनेछन्।

चैत २२ गते ओलीले बिमस्टेक शिखर सम्मेलनलाई सम्बोधन गर्नेछन्। सम्मेलनपछि अन्य मुलुकका नेताहरूसँग भेटवार्ता गर्ने कार्यक्रम छ। सोही दिन मेरिटाइम ट्रान्स्पोर्ट कोअपरेशन अग्रिमेन्टमा हस्ताक्षर समारोहमा सहभागी हुनेछन्।

प्रधानमन्त्री ओलीको भ्रमण टोलीमा प्रथम महिला राधिका शाक्य, परराष्ट्रमन्त्री डा. आरजु राणा देउवा, मुख्य सल्लाहकार विष्णुप्रसाद रिमाल, आर्थिक सल्लाहकार डा. युवराज खतिवडा, मुख्यसचिव एकनारायण अर्याल, परराष्ट्र सचिव अमृतबहादुर राई, निजी चिकित्सक डा. दिव्यासिंह शाह, प्रमुख स्वकीय सचिव राजेश बज्राचार्य, सुरक्षाकर्मी र सञ्चारकर्मी गरी २१ जना सदस्य छन्।

प्रधानमन्त्री ओली नेतृत्वको टोली चैत २३ गते स्वदेश फर्किनेछ।