मुगु । कर्णाली प्रदेशको हिमाली जिल्ला मुगुको खत्याड क्षेत्रका नागरिकहरुको दशकौँदेखिको बिजुली बाल्ने सपना अझै अपूरो छ।

१८ महिनामा सम्पन्न हुनुपर्ने बिरा बगर जलविद्युत् आयोजनाको स्थापना भएको १० वर्ष बितिसक्दा पनि निर्माण कार्य पूरा हुन सकेको छैन।

खत्याड गाउँपालिकामा राष्ट्रिय प्रसारण लाइन पुगेको छैन। स्थानीय गोकर्ण बहादुर शाहीले गुनासो गर्दै भने, “हामीले कहिले बिजुली देख्न पाउने? आयोजना वर्षौँ भइसक्यो, अझै पूरा भएको छैन। हाम्रा सपना अधुरै हुने भए।”

बिजुली अभावले साना उद्योग सञ्चालन गर्न कठिन भएको छ भने सञ्चार सेवा समेत प्रभावित भएको छ। कतिपय बस्तीहरू सञ्चार पहुँच बाहिर रहेका छन्। स्थानीय कविराज कार्कीका अनुसार “खत्याडमा इन्टरनेट त परको कुरा भयो, फोन गर्नसमेत समस्या छ।”

बिरा बगर जलविद्युत् आयोजना खत्याडका ११ वडाका ४,२०० घरधुरीलाई लक्षित गरी २०६९ सालमा डिपिआर तयार गरिएको थियो। २०७५ सालमा ठेक्का सम्झौता भए पनि कोभिड-१९ महामारी र २०७९ को भीषण वर्षाले संरचनाहरू बगाएपछि पुनः निर्माण गर्नुपर्ने भएकाले ढिलाइ भएको हो।

गाउँपालिका अध्यक्ष अजबहादुर शाहीका अनुसार विद्युत् मुहानको काम बाहेक अन्य सबै कार्य सकिएकाले २०८१ जेठसम्म आयोजना पूरा भई खत्याडबासीको सपना साकार हुने अपेक्षा गरिएको छ।

५०० किलोवाट क्षमताको यो परियोजनाको लागत २७ करोड ५५ लाख रुपैयाँ रहेको छ। एसियन डेभलपमेन्ट बैंक (ADB) को अनुदान, माछापुच्छ्रे बैंकको ऋण, तथा सहकारीको आन्तरिक व्यवस्थापनबाट लागत जुटाइएको छ। खत्याडबासीले दशकौँदेखिको बिजुली बाल्ने सपना पूरा हुने आशा गरिएको छ।