सुर्खेत। मध्यपश्चिम विश्वविद्यालयमा जारी स्वतन्त्र विद्यार्थी युनियन (स्ववियु) निर्वाचनमा नेविसंघका उम्मेदवार विवेक खड्काले आफ्नो अग्रता कायमै राखेका छन्।

हालसम्म १,८०३ मत गणना हुँदा अध्यक्ष, सचिव र कोषाध्यक्ष पदमा नेविसंघका उम्मेदवारहरू अगाडि रहेका छन्।

अध्यक्ष पदमा नेविसंघका विवेक खड्काले ८०८ मत प्राप्त गरी अग्रता कायम गरेका छन्। अनेरास्ववियुका जगत जंग शाहीले ६१० मत प्राप्त गरेका छन्।

अन्य उम्मेदवारहरू क्रमशः अखिल क्रान्तिकारीका प्रकाश वि.कले १६८, स्वतन्त्र उम्मेदवार मिलन बि.सिले ११४, नेक्राबिसंघकी अस्मिता सुनारले १३, अखिल समाजवादीका चिन बहादुर सहकारीले २५, राप्रबिसंघका विकल्प ओलीले १९ मत प्राप्त गरेका छन्।

सचिव पदमा नेविसंघका भुपेन्द्र आचार्य ९८५ मतसहित अगाडि छन् भने अनेरास्ववियुका भुपेन्द्र भण्डारीले ५१५ मत प्राप्त गरेका छन्। अन्य प्रतिस्पर्धीमध्ये अखिल क्रान्तिकारीका मोहन चौलागाईंले १८३, नेक्राबिसंघकी सर्मीला कुमारी बि.कले २०, अखिल समाजवादीका सुदर्शन एडीले २७, राप्रबिसंघका सन्देश शाहीले ८४ मत प्राप्त गरेका छन्।

कोषाध्यक्ष पदमा पनि नेविसंघकै उम्मेदवार लोक प्रसाद रिजाल ८९६ मतसहित अग्रस्थानमा छन्। अनेरास्ववियुका विक्रम सिंह मन्दिरले ५३९ मत प्राप्त गरेका छन्। अन्य प्रतिस्पर्धीमध्ये अखिल क्रान्तिकारीका दिप बहादुर सुनारले १९८, नेक्राबिसंघकी रमा गिरीले ४०, अखिल समाजवादीकी रितु बमले ५६, राप्रबिसंघका आशिष नाथ योगीले ५५ मत प्राप्त गरेका छन्।

मतगणनास्थलमा विद्यार्थी नेताहरू र समर्थकहरू उच्च उत्साहका साथ उपस्थित छन्। विश्वविद्यालय परिसरमा चुनावी माहोल तातेको छ भने उम्मेदवारहरू अन्तिम मतहरू आफ्नो पक्षमा पार्ने रणनीतिमा सक्रिय देखिन्छन्।

स्ववियु निर्वाचनको अन्तिम नतिजाले विश्वविद्यालयको विद्यार्थी राजनीतिमा ठूलो प्रभाव पार्ने विश्वास गरिएको छ। मतगणना निरन्तर जारी छ र केही समयमा नै पूर्ण परिणाम सार्वजनिक हुने अपेक्षा गरिएको छ।