सुर्खेत । नेपाल पत्रकार महासंघ सुर्खेत शाखाले लागू औषध दुर्व्यसन न्यूनीकरणसम्बन्धी सञ्चारकर्मीहरुलाई अभिमुखीकरण कार्यक्रम गरेको छ ।

बुधबार लागुऔषध दुर्व्यसन रोकथाम अभियान नेपालको समन्वयमा समाजमा बढ्दो लागुऔषध दुर्व्यसन न्यूनीकरणका लागि सञ्चारकर्मीहरूको भूमिका प्रभावकारी बनाउन अभिमुखीकरण कार्यक्रम गरेको हो ।

कार्यक्रममा सञ्चारकर्मीहरूलाई लागुऔषध नियन्त्रण, कानुनी व्यवस्था र सचेतनामूलक अभियानबारे जानकारी दिइएको थियो।

कार्यक्रमका प्रशिक्षक पूर्व प्रहरी वरिष्ठ उपरीक्षक तथा NDAPMका राष्ट्रिय अध्यक्ष बसन्तराज कुवँरले नेपालमा लागुऔषध दुर्व्यसनको अवस्था र नियन्त्रणका उपायबारे प्रकाश पारे । उनले सञ्चारमाध्यमले सचेतना अभिवृद्धि गर्दै समाजमा सकारात्मक प्रभाव पार्न सक्ने उल्लेख गरेका छन् ।

जिल्ला प्रहरी कार्यालय सुर्खेतका डिएसपी वीरेन्द्रवीर विश्वकर्माले लागुऔषध नियन्त्रणका लागि प्रहरीले अपनाएका रणनीति र सचेतनामूलक प्रयासबारे जानकारी गराउँदै कानुनी कारबाही मात्र नभई समुदायस्तरमै सचेतना फैलाउन आवश्यक रहेको बताए।

नेपाल पत्रकार महासंघ कर्णाली प्रदेशकी उपाध्यक्ष अप्सरा विष्टले सञ्चारमाध्यममार्फत समाजमा सकारात्मक सन्देश प्रवाह गर्ने पत्रकारहरूको भूमिकालाई विशेष महत्त्व दिनुपर्ने बताइन्।

नेपाल पत्रकार महासंघ सुर्खेतका अध्यक्ष शुशीलराज शर्माले सञ्चारकर्मीहरू समाजको ऐना भएको उल्लेख गर्दै, लागुऔषध दुर्व्यसनजस्ता गम्भीर सामाजिक समस्यालाई उजागर गर्न सञ्चारमाध्यमहरूले सक्रिय भूमिका खेल्नुपर्ने बताए।
उनले सञ्चारकर्मीहरूलाई सिकेका कुरा व्यवहारमा उतार्न अनुरोध समेत दिए।

त्यस्तै, जिल्ला प्रशासन कार्यालय सुर्खेतका सहायक प्रमुख जिल्ला अधिकारी डिल बहादुर कार्कीले लागुऔषध नियन्त्रणका लागि कानुनी तथा प्रशासनिक पहलबारे जानकारी दिँदै स्थानीय प्रशासनको तर्फबाट लागुऔषध नियन्त्रणमा विभिन्न अभियान सञ्चालन गरिरहेको बताए। तर, केवल कानुनी कारबाही गरेर मात्र यो समस्या समाधान नहुने भन्दै परिवार, समाज, शैक्षिक संस्था र सञ्चार जगत सबैले समन्वयात्मक रूपमा अघि बढ्न आवश्यक छ रहेको जनाए।

अभिमुखीकरण कार्यक्रममा सञ्चारकर्मीहरू, प्रहरी प्रशासनका प्रतिनिधि तथा सरोकारवालाहरूको सहभागिता रहेको थियो।