सुर्खेत । सुर्खेत उपत्यकामा खानेपानी वितरण गर्दै आएको सुर्खेत उपत्यका खानेपानी संस्थाले प्रत्येक ९६ घण्टाको अन्तरालमा मात्र धारामा पानी उपलब्ध गराउने निर्णय गरेको छ।

लामो समयदेखि परेको सुख्खा खडेरीका कारण पानीका स्रोतहरू सुक्दै गएपछि यस्तो व्यवस्था लागू गर्नुपरेको संस्थाले जनाएको छ।

संस्थाका अनुसार उपत्यकामा दैनिक ३८८ लिटर प्रति सेकेन्ड खानेपानी आवश्यक पर्ने भएपनी हाल पानीका मुख्य स्रोतहरूबाट जम्मा ९० लिटर प्रति सेकेन्ड मात्र आपूर्ति भइरहेको छ।

संस्थाका ईन्जिनियर बालाराम तिवारीका अनुसार पहिला देखि नै झुप्रा खोलाबाट ८६, खरिखोला र बोरीखोलाबाट ३०, ईत्राम खोलाबाट २७, दुन्दुरे खोलाबाट ५ र खोर्के खोलाबाट १० लिटर प्रति सेकेन्ड पानी आपूर्ति हुँदै आएको थियो।

तर पानीको स्रोत घट्दै जाँदा अहिले झुप्राबाट ५०, खरीबोरी खोलाबाट २०, ईत्राम खोलाबाट १०, दुन्दुरे खोलाबाट ५ र खोर्के खोलाबाट ५ लिटर प्रति सेकेन्ड मात्र पानी संकलन हुन सकेको छ।

खडेरीको कारण निम्तिएको समस्याका कारण तीन दिनको अन्तरालमा मात्र पानी वितरण गर्ने निर्णय गरेको हो। वितरण तालिका सार्वजनिक गर्दै संस्थाले उपभोक्ताहरूलाई पर्ने असुविधाप्रति क्षमायाचना समेत गरेको छ।

उपत्यकाको असमान भौगोलिक बनावटका कारण केही क्षेत्रमा पानी पुग्ने तर केहीमा नपुग्ने समस्या देखिन सक्ने भएकाले उपभोक्ताहरूलाई समस्या भए संस्थासँग सम्पर्क गर्न इन्जिनियर तिवारीले आग्रह गरेका छन्।