सुर्खेत । आगामी जेठमा कर्णाली प्रदेशमा आयोजना हुने १० औं राष्ट्रिय खेलकुदको लोगो र मस्कट सार्वजनिक गरिएको छ। मंगलबार ललितपुरस्थित अन्तर्राष्ट्रिय खेलकुद परिसरमा युवा तथा खेलकुद मन्त्री तेजुलाल चौधरीले लोगो र मस्कटको अनावरण गरे।

मस्कटमा रेड पाण्डा राखिएको छ भने लोगोमा सात रङ, चन्द्र र सूर्यको चित्रण गरिएको छ। मन्त्री चौधरीले प्रतियोगितामा सहभागी हुने खेलाडी र प्रशिक्षकको अनलाइन दर्ता प्रणाली पनि सार्वजनिक गरेका छन्।

यस प्रणालीमा खेलाडी र प्रशिक्षकहरूले आफ्नो नाम दर्ता गराउन सक्नेछन्। कर्णाली प्रदेशमा आगामी ३ जेठदेखि १० जेठसम्म १० औं राष्ट्रिय खेलकुदको महाकुम्भ आयोजना हुने मिति तय गरिएको छ।

यसअघि २०८१ मंसिरमा आयोजना हुने भनिएको प्रतियोगिता पूर्वाधारको कमीका कारण चैतमा सारिएको थियो। त्यसपछि पुनः तयारी नपुगेको भन्दै तेस्रो पटक प्रतियोगिता सरेर २०८२ जेठमा तय गरिएको हो।