मप विश्वविद्यालयमा स्ववियुको निर्वाचन सम्पन्न, आजै मतगणना हुने

सुर्खेत । मध्यपश्चिम विश्वविद्यालय (एमयू) मा स्वतन्त्र विद्यार्थी युनियन (स्ववियु) निर्वाचनका लागि मतदान सम्पन्न भएको छ।

आज सोमबार बिहान ९:३० देखि बेलुका ५ बजेसम्म मतदान प्रक्रिया सञ्चालन भयो।

सहायक मतदान अधिकृत जगत ढकालका अनुसार कूल ४ हजार ३ सय ८३ मतदातामध्ये २ हजार ८ सय ६४ जनाले मात्र मतदान गरेका छन् ।

जसअनुसार मतदान प्रतिशत ६५.३४ रहेको छ। निर्धारित समय बिहान ८ बजे भए पनि आन्तरिक तयारी अपूर्ण भएकाले मतदान प्रक्रिया डेढ घण्टा ढिलो गरी सुरु भएको थियो।

६ वर्ष पछि भएको विश्वविद्यालयको स्ववियुको निर्वाचन उत्साहजनक भएता पनि करिब ३४ प्रतिशत विद्यार्थी भने सहभागी भएनन् । मतदान सम्पन्न भएसँगै आजै बेलुका देखि नै मतगणना सुरु हुने ढकालले जानकारी दिए ।

अहिले मुचुल्का तयार भइरहेको बताउदै संगठनहरूसँगको सहमतिपछि बेलुका नै गणना सुरु गर्ने तयारी गरेको उनले बताए।




फेसबुकबाट तपाईको प्रतिक्रिया