सुर्खेत। नेपाल मोबाइल व्यवसायी महासंघ, कर्णाली प्रदेशको प्रारम्भिक वार्षिक साधारण सभा आज सुर्खेतमा एक भव्य समारोहबीच सम्पन्न भएको छ। प्रदेशभरिका मोबाइल व्यवसायीहरूको उल्लेखनीय उपस्थिति तथा विभिन्न सरोकारवाला निकायका प्रतिनिधिहरूको सहभागितामा सभा उत्साहजनक वातावरणमा सम्पन्न भएको हो।

कार्यक्रमको उद्घाटन नेपाल मोबाइल व्यवसायी महासंघका केन्द्रिय उपाध्यक्ष दिपक पाण्डेले गरे। उनले कर्णाली प्रदेशमा बढ्दो मोबाइल तथा डिजिटल प्रविधिको विस्तारसँगै व्यवसायिक क्षेत्रमा देखिएको सम्भावनाको चर्चा गर्दै मोबाइल व्यवसायलाई संयम, पारदर्शिता र सेवा केन्द्रित व्यापारका रूपमा अगाडि बढाउन आग्रह गरे। “मोबाइल व्यवसाय अब केवल व्यापार मात्र होइन, सूचना प्रवाह र डिजिटल सशक्तिकरणको मूल आधार बन्न थालेको छ,” उनले भने।

महासंघका कर्णाली प्रदेश अध्यक्ष भगत रावल (भरत) ले महासंघ गठनपछिको प्रारम्भिक यात्राको समीक्षा गर्दै आगामी कार्यदिशा प्रस्तुत गरे। उनले महासंघलाई संस्थागत रूपमा सुदृढ बनाउँदै व्यवसायीहरूका हकहितको सुनिश्चितताका लागि संघर्ष जारी राख्ने प्रतिबद्धता जनाए। उनले सबैको सहयोगप्रति आभार व्यक्त गर्दै निकट भविष्यमा तालिम, प्रविधिमैत्री व्यापार अभ्यास र नीति संवादमा प्राथमिकता दिने जानकारी गराए।

यस अवसरमा सुर्खेत उद्योग वाणिज्य संघका अध्यक्ष हर्ष विक्रम खड्काले मोबाइल व्यवसायको भूमिकालाई डिजिटल कारोबारको मेरुदण्डका रूपमा व्याख्या गर्दै संघले यस्ता कार्यक्रममार्फत व्यवसायीहरूबीचको एकता, दक्षता र सचेतनालाई अझ मजबुत बनाउने विश्वास व्यक्त गरे। “कर्णालीजस्तो चुनौतीपूर्ण भूगोलमा मोबाइल व्यवसायको सुदृढीकरण र आधुनिकीकरण आवश्यक छ,” खड्काले भने, “यस्तो सभा साझा मंच बनेर नीति निर्माणमा समेत प्रभाव पार्न सक्छ।”

साधारण सभामा मोबाइल व्यापारसँग सम्बन्धित विविध समस्याहरू—जस्तै गैरकानुनी मोबाइल कारोबार, कर संरचनामा अन्योलता, इन्टरनेट सेवासँगको समन्वयको अभाव लगायतका विषयमा गहिरो छलफल गरिएको थियो। सहभागी विशेषज्ञहरूले यस्ता समस्याको समाधान संघ, सरकार र सरोकारवाला निकायहरू मिलेर गर्नुपर्नेमा जोड दिए।

सभामा कर्णाली प्रदेशका १० वटै जिल्लाबाट प्रतिनिधित्व थियो, जसले प्रदेशस्तरीय एकता र सहकार्यको सन्देश दिएको छ। यसै क्रममा महासंघका निर्वाचित पदाधिकारीहरूलाई प्रमाणपत्र वितरण गरिएको थियो।

कर्णाली प्रदेशमा मोबाइल व्यवसायसँग सम्बन्धित पहिलो औपचारिक प्रदेशस्तरीय भेलाको रूपमा यो सभा ऐतिहासिक भएको बताइएको छ। महासंघले यस्ता साधारण सभालाई प्रत्येक वर्ष निरन्तरता दिने प्रतिबद्धता व्यक्त गरेको छ।