सुर्खेत । वीरेन्द्रनगरस्थित उषा बालबाटिकामा अध्ययन गर्ने विद्यार्थीहरू १६ वर्षीया इनिशा विकको मृत्यु प्रकरणमा न्यायको माग गर्दै आन्दोलित बनेका छन्  ।

कक्षा ११ मा अध्ययनरत आफ्नै साथीहरु इनिशाको बलात्कारपछि हत्या भएको भन्दै विद्यार्थीहरूले निष्पक्ष छानबिन गरी दोषीलाई कडा कारबाही गर्न माग गरेका छन् ।

इनिशाका सहपाठी तथा विद्यालयका विद्यार्थीहरूले जिल्ला प्रहरी कार्यालय सुर्खेतको गेटअगाडि धर्ना दिँदै घटनाको सत्यतथ्य सार्वजनिक गर्न र पीडित परिवारलाई न्याय दिलाउन राज्य गम्भीर हुनुपर्ने बताएका छन् ।

उनीहरूले घटनामा संलग्न जोसुकै भए पनि कानुनी दायरामा ल्याई कडा कारबाही गर्न माग गरेका छन् ।

प्रदर्शनका क्रममा केही समय विद्यार्थीहरू विद्यालयअगाडि समेत धर्नामा बसेका थिए । आफ्नै साथीको मृत्यु भएपछि आक्रोशित बनेका विद्यार्थीहरूले निष्पक्ष छानबिन बिना घटनालाई ढाकछोप गर्न नहुने बताएका छन् ।

गत २३ फागुनमा वीरेन्द्रनगरस्थित जनजागरण सामुदायिक वनमा इनिशा अचेत अवस्थामा फेला परेकी थिइन् । उनलाई उपचारका लागि कर्णाली प्रदेश अस्पताल पुर्‍याइए पनि चिकित्सकले मृत घोषणा गरेका थिए ।

पोष्टमार्टम रिपोर्ट अनुसार शारीरिक सम्बन्धपछि अत्यधिक रक्तस्रावका कारण उनको मृत्यु भएको उल्लेख छ । घटनास्थलबाट पक्राउ परेका १६ वर्षीय बालकले इनिशासँग शारीरिक सम्बन्ध राखेको र त्यसपछि रक्तस्राव भई अचेत भएको बयान प्रहरीसमक्ष दिएका छन् ।

इनिशाको मृत्यु प्रकरणपछि नागरिक समाज, अधिकारकर्मी तथा स्थानीयहरूले निष्पक्ष छानबिन गरी पीडित परिवारलाई न्याय दिनुपर्ने माग गर्दै आवाज उठाइरहेका छन् ।