सुर्खेत । मध्यपश्चिम विश्वविद्यालयमा विद्यार्थीलाई प्रश्नपत्र र उत्तरपुस्तिका वितरण गरिसकेपछि परीक्षा स्थगित भएको छ ।

आज बिहान साढे ६ बजे प्रश्नपत्र र उत्तरपुस्तिका वितरण भई विद्यार्थीहरूले लेख्न थालिसकेपछि विश्वविद्यालयले अचानक परिक्षा स्थगित गरेको हो ।

ग्राजुएट स्कूल अफ ह्युमानिटिज एण्ड सोसल साइन्सअन्तर्गत स्नातक तह प्रथम र सातौं समेष्टरको मिडटर्म परीक्षा सुरु भइसकेपछि अचानक विद्यार्थीलाई पूर्वजानकारी बिना नै स्थगित गरिएको हो ।

एमयूमा चैत १८ गते हुन लागेको स्वतन्त्र विद्यार्थी युनियन (स्ववियु) निर्वाचन गर्न गठित निर्वाचन समितिले अन्तिम घडीमा आएर परीक्षा स्थगित गरेको हो ।

‘उपर्युक्त सम्बन्धमा स्वतनत्र विद्यार्थी युनियन निर्वाचन समितिको मिति २०८१।१२।०२ को पत्रानुसार र मध्यपश्चिम विश्वविद्यालय ग्राजुयट स्कुल अफ ह्युमानिटिज एण्ड सोसल साईन्स अन्तर्गत संचालित सम्पूर्ण केन्द्रीय विभागका विभागीय प्रमुखहरूको मिति २०८१ साल चैत ३ गते बसेको संयुक्त विभागीय बैठकको निर्णय नं. १ अनुसार मिति २०८१ साल चैत्र ०३ गते देखि हुने भनिएको स्नातक तह प्रथम र सातौँ सेमेष्टरको मध्यवर्ती परीक्षा अर्को सूचना नआए सम्मको लागि स्थगन गरिएको व्यहोरा सम्वन्धित सबैमा जानकारी गराइन्छ,’ विश्वविद्यालयले जारी गरेको सूचनामा भनिएको छ ।