सुर्खेत। कर्णाली प्रदेश अस्पताललाई प्रतिष्ठानका रूपमा रूपान्तरण गर्ने उद्देश्यले गठित उच्चस्तरीय अध्ययन समितिले प्रदेश सरकारलाई सुझावसहितको प्रतिवेदन प्रस्तुत गरेको छ। समितिका संयोजक प्राडा भगवान कोइरालाले आइतबार मुख्यमन्त्री यामलाल कँडेललाई उक्त प्रतिवेदन बुझाएका हुन्।

यस प्रतिवेदनमा कर्णाली प्रदेश अस्पतालको संरचनात्मक र संस्थागत सुधारका लागि विशिष्ट स्वास्थ्य सेवाहरू सञ्चालन गर्ने प्रस्ताव गरिएको छ। यसले प्रदेशमा स्वास्थ्य सेवाको पहुँच र गुणस्तरमा सुधार ल्याउन मद्दत गर्ने अपेक्षा गरिएको छ।

प्रस्तावित योजनामा प्रदेश अस्पतालबाट हालसम्म सञ्चालन नभएका विशिष्ट सेवाहरू सुरु गर्न सकिने र यसले अतिरिक्त आय स्रोतहरूको पहिचान गर्न मद्दत गर्ने कुरा उल्लेख गरिएको छ।

मुख्यमन्त्री कँडेलले कर्णालीवासीका लागि दीर्घकालीन योजनाको लागि सबैको राय र सुझावलाई समेटेर स्वास्थ्य क्षेत्रको सुधारका कार्यलाई अघि बढाउने बताएका छन्।