सुर्खेत । मध्यपश्चिम विश्वविद्यालयअन्तर्गत विद्यापुर जनता बहुमुखी क्याम्पसमा सम्पन्न स्वतन्त्र विद्यार्थी युनियन (स्ववियु) निर्वाचनको नतिजा सार्वजनिक भएको छ।

३४० मतदातामध्ये २९७ जनाले मतदान गरेका थिए। निर्वाचन परिणामअनुसार प्रमुख पदहरूमा नेपाली कांग्रेसनिकट नेपाल विद्यार्थी संघ (नेविसंघ) को प्रभाव देखिएको छ।

सभापति पदमा नेविसंघका चेतन नेपाली १५३ मत प्राप्त गर्दै विजयी भए भने उनका प्रतिस्पर्धी अखिल क्रान्तिकारीका जनक विष्ट १३६ मतमा सीमित रहे।

सचिव पदमा अनेरास्ववियुका हार्दिक भण्डारीले १५६ मत ल्याएर जित दर्ता गरे। नेविसंघकी शिक्षा थापा १३२ मतका साथ दोस्रो स्थानमा रहिन्।

कोषाध्यक्ष पदमा पनि नेविसंघकै वर्चस्व रह्यो। कल्पना कुमारी थापाले १५२ मत प्राप्त गर्दै विजय हासिल गरिन् भने अनेरास्ववियुकी अस्मिता कँडेल १३४ मतमै रोकिइन्।

सदस्य पदमा नेविसंघका दिलीप माझी (१३९ मत) र विमल शाक्य (१३७ मत) निर्वाचित भए। उनका प्रतिस्पर्धी डम्मर खत्रीले १३२ तथा राजेन्द्र सुनारले ११५ मत प्राप्त गरे।