काठमाडौं । शुक्रबार काठमाडौंको तीनकुनेमा भएको हिंसात्मक प्रदर्शनका मुख्य संयोजक मेडिकल व्यवसायी दुर्गा प्रसाईं अझै पक्राउ परेका छैनन्। प्रहरी प्रशासनले व्यापक खोजी जारी राखे पनि उनी फरार रहेका छन्।

प्रदर्शनमा संलग्न रहेको आरोपमा राप्रपाका उपाध्यक्ष रवीन्द्र मिश्र, महामन्त्री धवलशमशेर जबरासहित पाँच जनालाई प्रहरीले गएराति नै पक्राउ गरेको थियो। तर, मुख्य अभियुक्त मानिएका प्रसाईं भने अझै प्रहरीको पहुँचभन्दा बाहिर छन्।

काठमाडौं प्रहरी परिसर र उपत्यका अपराध अनुसन्धान कार्यालय उनको खोजीमा जुटिरहेका छन्। काठमाडौं प्रहरी परिसरका प्रवक्ता एसपी अपिलराज बोहराका अनुसार प्रसाईं सम्पर्कविहीन छन्। नेपाल प्रहरीका केन्द्रीय प्रवक्ता डिआइजी दिनेशकुमार आचार्यले प्रसाईंका निकटस्थहरू पनि मोबाइल स्वीच अफ गरी फरार रहेको बताएका छन्।

शुक्रबार निषेधित क्षेत्रमा प्रवेश गरेर प्रदर्शन चर्काउने क्रममा प्रसाईंले आफ्नो गाडी प्रहरी भिडतर्फ हुइँकाएपछि स्थिति थप तनावग्रस्त बनेको थियो। घटनास्थलबाट भिडिओ खिचिरहेका युट्युबर पनि हाल फरार रहेको एसपी आचार्यले जनाएका छन्।

तीनकुनेको घटनामा दुई जनाको मृत्यु भएको थियो भने ११० जना सुरक्षाकर्मी घाइते भएका थिए। प्रदर्शनका क्रममा १४ स्थानमा आगजनी र १५ वटा निजी तथा सरकारी गाडी जलाइएको प्रहरीले जनाएको छ।

काठमाडौं प्रशासनले अपराह्नदेखि नै कर्फ्यु आदेश जारी गरेको थियो। साँझदेखि प्रसाईंको खोजी थालिएको भए पनि उनले मोबाइल स्वीच अफ गरेर आफूलाई लुकाएको बताइएको छ। प्रहरीका अनुसार उनको अन्तिम लोकेशन गैरीगाउँ देखिएको थियो।

डिआइजी आचार्यले प्रसाईंलाई ज्यान मार्ने उद्योग, हिंसात्मक गतिविधि, आगजनी र सार्वजनिक सम्पत्ति तोडफोडको आरोपमा कानुनी कारबाही अघि बढाउने जानकारी दिए। उनलाई पक्राउ गर्न काठमाडौं उपत्यकाका तीनै जिल्लामा प्रहरी परिचालन गरिएको छ।

यसैबीच, पक्राउ परेका राप्रपा नेताहरू रवीन्द्र मिश्र, धवलशमशेर जबरासहित पाँच जनामाथि कुन-कुन मुद्दा लगाउने भन्नेबारे छलफल भइरहेको एसपी बोहराले जानकारी दिए।