सुर्खेतमा जेन–जी आन्दोलन : तोडफोड, आगजनी र लुटपाटमा संलग्न खोजीमा प्रहरी

सुर्खेत । जिल्ला प्रहरी कार्यालय सुर्खेतले जेन–जी आन्दोलनका क्रममा सार्वजनिक तथा निजी सम्पत्तिमा तोडफोड, आगजनी र लुटपाटमा संलग्नमाथि एक्सन लिन सुरु गरेको छ । २३ र २४ भदौमा सुर्खेत जिल्लाका विभिन्न स्थानमा भएको विरोध प्रदर्शन तथा आन्दोलनका क्रममा भएका विभिन्न अप्रिय घटना, आगजनी, लुटपाट, आमसर्वसाधारणमा त्रास सिर्जना हुने किसिमका अन्य विविध घटनाहरूसँग सम्बन्धित तस्वीर, भिडियो तथा विभिन्न सामाजिक सञ्जालका लिंकहरू उपलब्ध गराउन सुर्खेत प्रहरीले अनुरोध गरेको छ ।

जिल्ला प्रहरी कार्यालय सुर्खेतका प्रवक्तासमेत रहेका प्रहरी नायब उपरीक्षक मोहनजंग बुढथापाले आन्दोलनका नाममा अराजकता फैलाउनेहरूको खोजी कार्य सुरु गरिएको बताए ।उनले निजी तथा सार्वजनिक सम्पत्तिमाथि तोडफोड, आगजनी र लुटपाट मच्चाउनेहरूलाई कानुनी दायरामा ल्याएर कसुरअनुसार कारबाही गरिने बताए ।

सामाजिक सञ्जाल बन्द तथा भ्रष्टाचार र अनियमिताका विरुद्धमा जेन–जीहरूले २३ भदौदेखि थालेको आन्दोलनमा सरकारले अत्यधिक बल प्रयोग गरेर सोही दिन १९ जनाको मृत्यु भएको थियो ।त्यसको बदला लिन दोस्रो दिन (२३ भदौ) सडकमा उत्रिएको जेन–जी प्रदर्शनकारीले कर्णालीका महत्त्वपूर्ण सरकारी निकायका दस्तावेजहरू ध्वस्त बनाएका थिए । यसका साथै विभिन्न सार्वजनिक पदधारण गरेका व्यक्तिहरूको निजी सम्पत्तिमा पनि अराजक युवाहरूको हुलले व्यापक क्षतिसँगै लुटपाट गरेको थियो ।